النسا والبنات إلّي يخدمو في الديار

تفرّجت في "دائرة الضوء" المرّ الّي فاتِت, عدّيت جُمعا كاملا إمبهّم. حكاو على النسا والبنات إلّي يخدمو في الديار وفي الإدارات.

منهم وَحدَ خدمت أربعين سنا عند عايل مِنغير ما إخلّصُها حتّى فرنك و مْبَعد كِكبرت وولاّت معادش تنجّم تخدم طيشوها (شوف الطرف 3 ). توّ بربّي نُرمال هالنّاس هاذوما؟ هاذي معنِتها عدّات حياتها تخدم بلاش, حتّى عايلتها مِلّي مشات علاها معادش تعرفهم, حتّى مِالعرس ما عَرّسِتش, توّا شكون باها كِتلوحت؟ شكون باش إعيّشها؟ فين باش تبات؟ . معنِتها عام 2010 وباقي فمّا ناس يِستعبدو في غيرهم! و نسا إلّي إصَمصرو باهم, ولِبنات الصغار إلّي هِزّو إخَدمُهم بعاد على والداهم. وين الرَقاب؟

وفمّ حال أُخرا فاها مْرا تنظّف في مَحطّات المِترُ عندها 25 سنا تخدم بلا كُنتراتو. و إخلصو فاها 180 دنار. و هاذي كِلُخرا باش ترسّلها مسكينَ بلاش أَنْتريت. منغير ما نكمّل نحكيلكم على الحال التعيسَ إلّي تخدم فاها.(شوف الطرف 7 )

شنوّا الحل؟
- علاش مازالو فمّا شريكات تنظيف يخدّمو في عباد بطريق غير قنونيّ, بلاش كُنتراتو, بلاش ضمنات...؟
- علاش العايلات إلّي تخدّم فاهم ما دِكلاريش علاهم فيالـصندوق القومي الإجتماعي؟(سِ.ن.س.س)ـ
- علاش هالنّاس هاذوما إلّي عندهم مدخول ضعيف,مثلا ماإسَهلّولهُمش باش إحلّو كُنت متع بانكا, باش نهار الّي ماإخلسوهُمش’ عندهم عل أقل باش يَستدلّو؟
- علاش ما فمّاش فين النّاس هذوما يمشِيو يِسألو, باش إنجمو يعرفو كِفاش يسَوِّيوو وضعِيّتهم القانونيّ, آلاخاطر أكثريتهم جاهلين ما يعرفوش يقراو.

البرنامج مقسّم على 7طروف
1: http://www.facebook.com/video/video.php?v=105886009453897
http://www.facebook.com/video/video.php?v=105888219453676 :2
http://www.facebook.com/video/video.php?v=105889759453522 :3
http://www.facebook.com/video/video.php?v=105891726119992 :4
http://www.facebook.com/video/video.php?v=105893839453114 :5
http://www.facebook.com/video/video.php?v=105896519452846 :6
http://www.facebook.com/video/video.php?v=10150144489040261 :7