باهي المرحلة الثانيه هي منع بنيي الجوامع وحتى تسكيرهم ومنع الأذان بطبيعة الحال: علاش؟ آلاخطر الدولة العلمانية الهدف متاحها هي محاربة الاسلام، و من أول حاجات اللب تنجم تبدا بيهم في المعركة هاذي هي تسكير الجوامع وحتى تكسيرهم كان لزم، آلاخاطر كيما نعرفو نحنا اللي الصلاة ما تجي كان في الجامع وبتسكيرها الناس فيسع تبطل تولّي معادش تصلّي، وبطريقة هاذي ينجحو في المرحلة ثانية بكل سهولة باش البلاد يولّي معاد فاها حد يصلّي، تي حتّى مالشيوخ الكل والأيمة تبطل الصلاة. والعلمانيين المتدينين اللي يصليوو ، أه كيفاش؟ علمانيين يصليووا؟ لا لا ما فمّاش منها لحكاية هاذي، العلمانين الكل ماسونيين وكفار ويعبدو في الشواطن وصهيونيين ومسيح ويهود، تي ماو المسيح واليهود يعبو في الشواطن ياخي ما في بالكُمش؟ لا معروفة لحكايةـ
باهي المرحلة ثالثة هي ينسييو الناس في دينهم: ينحييو التربية الاسلامية من المكاتب ويسكّرو "الكتّاب" وبطبيعة الحال الأيمة والشيوخ ديجا مالمرحلة لوله بطلو الصلاة وتهناوو علاهم ما عاد فيهم حد مازال عينو باش يعلم القرآن والدين. والبرامج الدينية بطبيعة الحال زادا تتنحى مالتلفزا، الأذان هذاكا بمأنو ماعاد حد يصلي وماعادش فمّا جوامع يتنحى بطبيعتو ،حتى مالشاناة الدينية كيفهم كيف بلاش هوما التوانسا بطبيعتهم ما يتبعوهمش وحتى لوكان يتبعوهم ما عندهم حتى تأثير.ـ
المرحلة الرابعة وهي المرحلة الانتقالية: كيما نعرفو العلمانية أصلها مسيحية يهودية ماسونية صهيونية، اول حاجة تبدا بيها في المرحلة هاذي بعد ما الناس بطلو معادش يصليو ونساوو دينهم، وبطبيعتهم هوما مسطكين فيسع ما يصدقو ويتبعو، تقوم بنشر المسيحية واليهودية ويحلّو كنيسييات في بلاصة الجوامع. آلاخطر لللي ما يعرفش العلمانية كي بدات في البلدان الغربية حاربة الاسلام ومن بعد شجعت المسيحية واليهودية، هذاكا علاش الغرب ولاّ مسيحي توّا.ـ
المرحلة الخامسه: ولاّشي الشعب كافر ويعب في الشواطن، تنحي العطل الدينية وتبدلها بعطل مسيحية ويهودية، خلي توانسا يتعلمو نووال و الپاك.ـ
المرحلة السادسة: تجي بطبيعتها وزارة الشؤون الدينية تتسكر والمفتي اولّي بطال، هذا كان موش ولّى ببّاص مسيحي ولاّ يهودي
والمرحلة السابعة والأخيرة: يتم نشر المثلثات في كامل أنحاء الجمهورية وكامل القطاعات وتعويض رقم سبعة بمثلّث وحتى قناة سبعة الوطنية تولّى قناة المثلث الوطنية، ويوم السابع من نوفمبر يولّي اليوم الثولاثي من نوفمبر المبارك، اللي ناس تخرج فيه باش تزور المعابد الماسونية وتصلي للرّب الماسوني الأعضم.ـ
مالاخر: الدولة العلمانية الهدف متاحها هي محاربة الدين والمسلمين بالذات ونشر الماسونية والمسيحية واليهودية، آلاخاطر المسيحية واليهودية ماهمش ديانات بالعكس يعبدو في الشواطن. في الحقيقة العلمانية هي راهو ماهيش فصل الدين على الدولة!! هاذوكم يحبو يحاربو الدين وينشرو المسيحية ويهودية ويحلّو معابد ماسونية باش لعباد تعبد الرّب الماسوني. ومن أهداف الاجتماعية نشر الدعارة وعصابات النهب والاختصاب والمخدّرات،(3) أصحاب العصابات يلقاو تدعيم مالدولة كيما الأحزاب السياسية. والعلمانية هي مذهب دين الالحاد و الكفر وعبادة الشواطن(3) ـ
-------------
هوامش
